nah chain aataa hai din ko nah shaam aataa hai **

nah chain aataa hai din ko nah shaam aataa hai
tumhaaraa Zikr zabaaN par mudaam aataa hai!

dua'a ko haath` uTh`e haiN, zabaaN naheeN hiltee!
namaaz-e-i'shq meN yeh bh`ee maqaam aataa hai!

Khudaa kaa Khauf karo! i'sqk meN yeh kyaa kam hai?
Khudaa ke ba'd tumhaaraa hee naam aataa hai!

a'jab yeh kaisaa hai dastoor-e-anjuman yaaro!
jab aataa hai yahaaN Khaalee hee jaam aataa hai?

fisaad-e-i'shq meN ik maiN hee kuch` naheeN badnaam
tiraa bh`ee naam sar-e-raah-e-a'am aataa hai!

nah dostee kee hee Soorat, nah dushmanee kaa raNg
a'jeeb t^aur se un kaa salaam aataa hai

bas ek Gham hee miree zindagee kaa saath`ee hai
koyee kisee ke kahaaN warnah kaam aataa hai?

saNbh`al ai dil! Silah-e-ashk-e-Gham yehee to hai
kisee naz^ar kaa Khamosh ik payaam aataa hai!

nigaah-e-lut^f idh`ar ek, bh`ool kar hee sahee!
sunaa hai yeh keh tumheN yeh bh`ee kaam aataa hai

nah dil-giriftah Gham-e-mustaqil se ho "Sarwar"!
sunaa hai yeh bh`ee muHabbat meN kaam aataa hai

غزل