muHabbat meN aah-e-rasaa chaahataa hooN *

muHabbat meN aah-e-rasaa chaahataa hooN
mujh`e kyaa huwaa? maiN yeh kyaa chaahataa hooN?

wafaa,oN ke badle wafaa chaahataa hooN
bataa,o keh maiN kyaa buraa chaahataa hooN?

siyaasat se ulfat kee naa-aashnaa ho
maiN dil woh junooN-aashnaa chaahataa hooN!

har ik bandish-e-kufr-o-eemaaN se bach kar
jo qiblah ho qiblah-numaa, chaahataa hooN

kahaaN tak yeh de gaa fareb-e-musalsal?
zamaaneh se maiN pooch`naa chaahataa hooN

qiyaamat jo dil par muHabbat meN guZree
maiN is se bh`ee kuch` aur siwaa chaahataa hooN

nah ho intihaa jis kee nai-raNgiyoN kee
muHabbat kee woh ibtidaa chaahataa hooN

muHabbat meN kyaa ho gayaa mujh` ko "Sarwar"?
jo Khud se bh`ee maiN faaSilah chaahataa hooN!

غزل