AA,EENAH!

AA,EENAH

maiN apnee mulaazimat par Houston meN jab pehle-pehal poNhchaa to logoN se ma'loom huwaa keh meraa puraanaa dost Akhlas Ahmad shehr kee ek mash,hoor engineering company meN muddat se manager kee Haiciyyat se kaam kar rahaa th`aa. bees saal puraanee baateN yaad aa gayeeN. Akhlas Ahmad ke itnee baRee firm meN manager hone kee Khabar sun kar maiN ne daaNtoN meN to Khair uNglee naheeN dabaayee keh maiN ab us u'mr se guZar chukaa hooN jab har an-honee baat ek man-gh`aRat afsaanah ma'loom hotee hai. albattah ta,a'juub KhaaSah huwaa keh "yaa ilaahee yeh maajiraa kyaa hai?" Akhlas Ahmad aur engineering manager? yooN meHsoos huwaa jaise yaa to yeh Khabar hee ek sire se Ghalat^ hai yaa ph`ir yeh koyee aur hee Akhlas Ahmad hai jis se maiN naa-waaqif hooN. Zaraa saa aur kuredaa to raSdeeq ho gayee keh yeh Zikr Aligarh waale apne hee Akhlas Ahmad kaa th`aa!

yaadash baKhair! Aligarh kee t^aalib-i'lmee kaa woh zamaanah bh`ee kyaa zamaanah th`aa jab maiN aur Akhlas Ahmad saath` saath` Aligarh Muslim University meN ta'leem HaaSil kar rahe th`e. kayee saal ke shab-o-roz ke saath` kee vajh se meraa us se gehraa yaaraanah ho gayaa th`aa. college meN to Khair din meN class yaa canteen meN waqt guZartaa hee th`aa, akcar maiN us ke gh`ar Sarai Rehman kee pur-pech galiyoN meN bh`ee chalaa jayaa kartaa th`aa aur woh bh`ee kabh`ee kabh`ee Amir Nishan ke paas mere gh`ar chalaa aataa th`aa. darmiyaaneh qad kaa gol-maTol badan, kh`ultaa huwaa raNg, guddee tak baRh`e huwe siyaah gh`ane baal jo hameshah tel se chamke aur kaNgh`ee se bane-saNware rehte th`e, chauRe chehre par pakoRah see naak aur moTe-moTe hoNT! meree naz^roN meN Akhlas kaa Hulyah gh`oom gayaa. us kee aaNkh`eN kaisee sharmaayee sharmaayee see rehtee th`eeN! ph`ir baateN bh`ee aisee dh`eemee aawaaz meN saNbh`al saNbh`al kar kartaa th`aa jaise agle zamaaneh kee bahoo-beTiyaaN kiyaa kartee th`eeN! wo apnee Zaat se baRaa seedh`aa-saadah aur be-Z^arar saa insaan lagtaa th`aa. haaN, us kee chaal Z^aroor bohat matwaalee th`ee! jh`oom jh`oom kar donoN haath` hilaataa huwaa a'jeeb waalihaanah andaaz meN chaltaa th`aa. ham log akcar us ko ch`eRne ke liYe kehte th`e:

"abe! yeh kyaa zanaanee chaal banaa rakkh`ee hai? mardoN kee t^araH chal, mardoN kee t^araH!"

jawaab meN us ke chehre par ek maKhSooS siyaasee muskuraahaT ph`ail jaatee. yeh muskuraahaT us kaa Trade Mark ho kar reh gayee th`ee. akcar woh bilaa-wajh muskuraayaa kartaa th`aa. dekh`ne waalaa samajh` hee naheeN saktaa th`aa keh Akhlas us kee kisee baat par Khush hai yaa us par haNs rahaa hai. koyee pooch`taa keh: "yaar! tum kyoN muskuraaYe jaa rahe ho?" to us kee muskuraahaT kuch` aur baRh` jaatee aur woh daaNt nikos kar a'ajizee se yooN sar jh`ukaa letaa jaise Haalaat-e-HaaZ^irah se us kaa koyee ta,a'luuq hee naheeN hai!

college meN chaar-ch`e dostoN kee hamaaree chanDaal-chaukaRee th`ee jis meN Syed Nazir Husain, Akhlas Ahmad, Aslam Zaheer aur Bhaayee Saaheb Asghar Abdul Qadir (jee haaN! in HaZ^rat kaa pooraa naam yehee th`aa!) pesh pesh th`e. college ke haNgaamoN meN aur college se baahar kee dh`amaa-chaukaRee meN ham sab baraabar ke gunaah-gaar th`e. Akhlas Ahmad is giroh meN kuch` be-joR saa ma'loom hotaa th`aa, jaise woh hamaaree be-haNgam Harakaat meN apnee saNbh`lee t^abee,a't se kuch` Th`ehraa,o saa paidaa karnaa chaahataa th`aa. ham meN se aur koyee maZhab kaa aisaa paaband naheeN th`aa. ek Akhlas Ahmad hee th`aa jo namaaz-roze kaa saKhtee se paaband th`aa aur baat baat meN :inshaa-Allah, maashaa-Allah: baRee riqqat bh`aree qir,at ke saath` ista'maal kiyaa kartaa th`aa. ham log agar koyee :wuZ^oo-toR: maZaaq karte to woh qir,at se :laa-Haul-a-walaa-quwaat: keh kar kh`isyaanee haNsee ke saath` idh`ar udh`ar dekh`ne lagtaa th`aa. baRaa hee :baa-wuZ^oo: qism kaa laRkaa th`aa. saRak par naz^reN jh`ukaa kar chaltaa aur door se kisee laRkee ko apnee jaanib aataa dekh` letaa to gh`abraa kar saRak kee doosree t^araf chalaa jaataa aur badan churaa kar yooN jaldee jaldee qadam baRh`aa kar nikal jaane kee koshish kartaa jaise woh laRkee us ko waheeN pakaR kar sar-e-raah nikaaH paRh`waane par israar hee to kare gee! waise yaar logoN kaa Khayaal th`aa keh yeh taSweer kaa Sirf ek hee ruKh th`aa aur Akhlas Ahmad aNdh`ere-ujaale chooktaa bh`ee naheeN th`aa! lekin is doosre ruKh kaa koyee cuboot kisee ko ab tak naheeN mil sakaa th`aa aur yeh ilzaam afwaah kee Haiciyat se aage kabh`ee naheeN baRh` sakaa th`aa.

paRh`ne likh`ne meN bh`ee Akhlas bas yooN hee saa th`aa aur akcar class ke Zaheen laRkoN se madad liyaa kartaa th`aa. imtiHaan bh`ee lashtam-pashtam pass kar hee letaa th`aa. beHc aur jhagRe se baRaa gh`abraataa th`aa. haaN, Syed Nazir Husain se doosre-teesre us kee ma'moolee see jh`aRap Z^aroor ho jaatee th`ee. Nazir nihaayat kaTTar qism kaa shi,a'h th`aa aur majlis, maatam aur ta'ziyad-daaree kaa jee-jaan se qaa,il th`aa. udh`ar Akhlas bh`ee apne maslak kaa saKhtee se paaband th`aa. donoN meN Khoob hee to beHc hotee. waise donoN hee apne apne maslak kee tafSeelaat se naa-waaqif th`e. chunaan.ch th`oRee der gh`isee-piTee beHc hotee jis kee taan hameshah yooN TooT-tee keh Nazir bh`innaa kar kehtaa: "bataa,o beTaa! tum sunniyoN meN hai koyee hamaare Kabban MiaN jaisaa a'alim faaZ^il?" aur jawaab meN Akhlas apnee maKhSooS muskuraahaT ke saath` kehtaa: "dekhaa! bachchoo ko jab aur koyee baat naheeN soojh`ee to saalaa le aayaa apne Kabban MiaN ko beech meN. hai nah dh`aaNdal-baazee?"

aur aaj yehee Akhlas Ahmad Amreekah meN engineering manager banaa baiTh`aa th`aa!

--------------------- (2) .................................

doosre din phone kiyaa to naam bataate hee Akhlas Ahmad mujh` ko pehchaan gayaa: "are, Raz! tum yahaaN kaise? kab aaYe? kyoN aaYe? mulaaqaat kab ho rahee hai?" us ne ek hee saaNs meN sawaaloN kee bh`armaar kar dee. lekin us kee aawaaz meN woh yagaanagat aur be-saaKhtagee naheeN th`ee jo mere Zehn meN apne dost Akhlas se waabastah th`ee. aur bh`alaa bees saal ke t^aweel a'rSeh ke ba'd ho bh`ee kaise saktee th`ee? waqt aur Haalaat ke haath`oN kaun bachaa hai jo ham hee meHfooz^ rehte? Khud maiN hee pehle jaisaa Raz kahaaN th`aa? waqt kaa haath` mujh` par bh`ee apnee kaaree-garee dikh`aataa rahaa th`aa aur har t^araH ke narm-o-garm tajriboN ke ba'd kam se kam yeh to z^aahir ho hee gayaa th`aa keh logoN se pehle jaisee ummeedeN rakh`naa aur dostee kee tawaqqo' fuZ^ool th`ee. idh`ar udh`ar kee baatoN ke ba'd maiN ne Akhlas ko agle itwaar kee shaam apne gh`ar kh`aane kee da'wat dee to th`oRee der kee Khaamoshee ke ba'd us ne kahaa: "yaar, aisaa hai keh tum hee idh`ar meree t^araf aa jaa,o. kh`aanaa kh`aaYeN ge aur ph`ir gap-shap ho gee."

maiN ne jawaab diyaa: "woh to Khair Th`eek hai. magar is martabah tum kyoN naheeN aa jaate? maiN ph`ir kisee mauqe' se tumhaaree t^araf aa jaa,ooN gaa."

Akhlas ne ruk kar dabee zabaan se kahaa: "bhayee! baat yeh hai keh tumhaare yahaaN se waapasee meN raat ho jaaYe gee aur maiN raat ko car naheeN chalaataa hooN. meree begam to car chalaatee hee naheeN haiN. tum hee yahaaN aa jaa,o to Th`eek rahe gaa."

maiN yeh sun kar ek lamHeh ko daNg reh gayaa. Amreekah meN jahaaN car a'ish kaa saamaan naheeN bal.k aisee Z^aroorat hai jis ke baGhair zindagee kaa taSawwur hee naa-mumkin hai kisee shaKhS kaa raat ko car nah chalaanaa nihaayat hee a'jeeb-o-Ghareeb baat hai. maiN ne munaasib naheeN samjh`aa keh wajh pooch`ooN. ma'loom naheeN keh us kee yeh a'adat kis Haadiceh kaa nateejah th`ee. apnee begam se jab maiN ne qiSSah sunaayaa to woh bh`ee Hairaan huyeeN. ph`ir Hasb-e-a'adat woh is fikr meN ulajh` gayeeN keh Akhlas Ahmad ke gh`ar pehlee baar jaate huwe kaun se kapRe pehne jaaYeN aur kyaa tuHfah le jaayaa jaaYe jo kam-Kharch bh`ee aur baalaa-nasheen bh`ee!

aur ph`ir ham agle itwaar raasteh bh`ar baateN karte rahe keh dekh`o aaj kyaa hotaa hai.

gh`anTee ke jawaab meN Akhlas Ahmad ne darwaazah kh`olaa to ham log baGhalgeer ho gaYe. bees saal meN us ke Hulyeh meN koyee KhaaS tabdeelee naheeN aayee th`ee. wohee gol-mol badan, wohee moTe hoNT aur wohee pakoRaa see naak! albattah baal Z^aroor kuch` ch`oTe ho gaYe th`e aur tel kee chamak se beniyaaz th`e. ikkaa-dukaa baal safed bh`ee ho gayaa th`aa. chehre par wohee pur-israar muskuraahaT th`ee lekin jis cheez ne meree tawajjuh apnee t^araf kh`eeNch lee woh us kee aaNkh`oN kee be-panaah udaasee th`ee. woh mujh` se Khushee aur tapaak kaa iz^aar karne kee koshish to kar rahaa th`aa lekin yeh masarrat us kee aaNkh`oN meN naheeN jh`alak rahee th`ee. bujh`ee bujh`ee see woh aaNkh`eN jaise dekh`te huwe bh`ee mujh` ko naheeN dekh` rahee th`eeN. gh`ar meN daaKhil huwe to us kee begam Shameem se ta,a'aruf huwaa. woh Akhlas se u'mr meN kaafee ch`oTee naz^ar aa rahee th`eeN. mujh` ko yaad aayaa keh logoN ne bataayaa th`aa keh woh us kee doosree beewee th`eeN.

chand minute ki baat-cheet meN hee andaazah ho gayaa keh bees saal kee t^aweel muddat ne ham logoN ko ek doosre ke liYe ajnabee banaa diyaa th`aa. nah puraanee baatoN meN woh lut^f th`aa aur nah hee puraane dostoN ke Zikr meN koyee mazaa. t^aalib i'lmee ke zamaaneh kee be-takallufee aur too-taRaaq to Khair ab kahaaN ho saktee th`ee, baat karne ko mauZ^oo' bh`ee mushkil se mil rahaa th`aa. maiN is Soorat-e-Haal se Khoob waaqif th`aa. Amreekah se har do-ek saal ka ba'd bhaa,iyoN se milne Hindustaan chalaa jaataa th`aa aur hameshah isee eHsaas se do-chaar hotaa th`aa keh sage bhaa,iyoN ke darmiyaan bh`ee das hazaar meel ke faaSileh aur kayee baras kee muddat ne deewaar see Haa,il kar dee th`ee. waaliden jo hamaaree zindagiyoN kaa markaz hote th`e Allah ko pyaare ho chuke th`e aur woh aqdaar jo ham meN mushtarik th`eeN aur baRee Had tak yagaanagat kaa sabab bh`ee th`eeN ab Ghaa,ib ho chukee th`eeN. har shaKhS apne apne masaa,il meN aisaa gum th`aa keh apanaa,iyat majrooH bal.k ma'doom ho chalee th`ee. ph`ir Akhlas se to meraa Sif dostee kaa hee rishtah th`aa!

kuch` der baateN huyee th`eeN ke Maghrib kaa waqt ho gayaa. maiN shaayad gh`ar meN namaaz nah adaa kartaa lekin is waqt doosre kaa mehmaan th`aa aur us gh`ar ke ma'moolaat kaa paaband. chunaan.ch jab Akhlas Ahmad namaaz ke liYe kh`aRaa huwaa to us ke do laRkoN ke saath` maiN bh`ee muqtadee ban kar kh`aRaa ho gayaa. qir,at shuroo' huyee to aawaaz meN riqqat meHsoos huyee. maiN ne us ko apne taSawwur kee karishma-saazee samajh` kar aaNkh`eN band kar leeN taa. k namaaz meN kuch` to Khusoo' rahe! Maghrib kee namaaz muKhtaSar hotee hai. Akhlas ne namaz Khatm kar ke dua'a ke liYe haath` uTh`aaYe to saath` hee hamaare haath` bh`ee uTh gaYe. ab ham sab Allah ke HuZ^oor Khaamosh aur tanhaa th`e.

maiN sar jh`ukaaYe, aaNkh`eN band kiYe dua'a maaNg hee rahaa th`aa keh achaanak Akhlas ke Halaq se ek gh`uTe gh`uTee see hichkee niklee. maiN ne gh`abraa kar dekh`aa to us ke bachche sehme sehme baiTh`e th`e. un kee aaNkh`eN apne baap par jamee huyee th`eeN aur chehroN par Khauf-o-hiraas kaa Ghubaar th`aa. Akhlas dunyaa se beKhabar aaNkh`eN band kiYe baiTh`aa th`aa. us ke haath` baNdh`e baNdh`e hee gir kar god meN paRe huwe th`e, aaNkh`oN se aaNsoo jaaree th`e aur hoNToN se be-iKhtiyaar hichkiyoN ke saath` dard bh`aree dua'a nikal rahee th`ee: "taubah, taubah! yaa Allah! taubah! maiN baRaa gunaah-gaar hooN! mere gunaah mu,a'af kar de maalik! taubah yaa Allah! taubah!"

maiN is manz^ar ke liYe kahaaN tayyaar th`aa! Shameem DubDubaayee huyee aaNkh`oN se apne shauhar ke karb kaa manz^ar bebasee se dekh` rahee th`eeN. un ke chehre kaa raNg uRaa huwaa th`aa. sharm-o-Khauf se kabh`ee meree jaanib dekh`teeN aur kabh`ee zameen ko gh`oorne lagtee th`eeN. un kee naz^roN ne yeh manz^ar nah jaane kitnee baar dekh`aa ho gaa lekin aaj yeh ek ajnabee ke saamne ho rahaa th`aa aur woh Khud ko be-dast-o-paa meHsoos kar rahee th`eeN! meree samajh meN aur kuch` nah aayaa to maiN ne zoroN se :aameen: keh diyaa. yak-laKht Akhlas kaa t^ilism TooT gayaa aur us kee bh`arrayee huyee aawaaz ek jh`aTke se Khaamosh ho gayee. chand lamHe us kee gehree gehree saaNseN sunaayee deeN aur ph`ir us ne hichkichaate huwe meree jaanib dekh`aa jaise apnee Ghalat^ee par mujh` se sharmsaar ho. maiN ne jaan-boojh` kar dua'a ke ba'd muNh par haath` ph`erne ke bahaane aaNkh`eN band kar leeN. maiN naheeN chaahataa th`aa keh meree nigaahoN ke sawaal us ko sharmindah kareN. qadre laRkh`aRate huwe qadmoN se Akhlas uTh`aa aur kursee par baiTh` gayaa. udh`ar Shameem kee dh`eemee aur sehmee aawaaz aayee: "chaliYe, kh`aanaa tayyaar hai." aur ham log mez kee t^araf chale gaYe.

ab har lamHah bh`aaree ho chalaa th`aa. koyee baat mushkil se hee soojh` rahee th`ee. chunaan.ch kh`aane ke faura" ba'd ham ne ijaazat lee aur mezbaanoN kaa shukriya adaa kar ke waapas chal diYe. raasteh bh`ar us shaam ke Ghair-ma'moolee waaqi,a'at par baat hotee rahee. Akhlas kaa andaroonee karb hameN bh`ee uljh`an meN Daal gayaa th`aa.
------------------------ (3) -------------------------

kehne waale kehte haiN keh jab Akhlas Ahmad awwal awwal Amreekah aayaa to wahaaN kee raNgeen fiZ^aa dekh` kar us kaa wuZ^oo kuch` Dh`eelaa paRne lagaa. Amreekah to woh jagah hai jahaaN kee akcar baateN wat^an-e-a'zeez se muKhtalif haiN. kh`aane-peene aur rehan-sehan se le kar samaajee aur aKhlaaqee qadroN tak kaun see aisee cheez hai jo Hindustan se miltee-jultee ho? wahaaN jo cheez Haraam hai, woh yahaaN Halaal hai aur wahaaN jo cheez Halaat hai us kaa to Zikr hee bekaar hai! yahaaN sharaafat, i'smat, buzurgee jaise daqyaanoosee Khayaalaat ko bh`alaa kaun pooch`taa hai? Dollar woh devtaa hai jis ke aage har insaan waalihaanah naach rahaa hai. wahaaN ab bh`ee zabaan, qalam aur haath` par chand paabandiyaaN lagee huyee haiN aur yahaaN har qism kee aazaadee hai jab tak keh us kee takmeel kisee aur ke Haq ko majrooH naheeN kartee. Saum-o-Salaat kaa paaband Akhlas Ahmad Khud ko aise saaNp kee Haalat meN paa rahaa th`aa jis ke muNh meN ch`ach`ooNdar aa gayee ho. woh nah to us ko nigal hee saktaa th`aa aur nah hee ugalnaa us ke iKhtiyaar meN th`aa. mizaaj aur a'qeedoN kee saKhtee ko Amreekah kee narm-o-shaadaab fiZ^aa ne aahistah aahistah kam karnaa shuroo' kar diyaa aur taubah-o-istiGhbaar kaa waz^eefah garm Khoon kee t^oofaanee Hiddat meN pigh`al gayaa. Akhlas ko Amreekah ab raah par lagaa chukaa th`aa!

ph`ir woh din bh`ee aa gayaa jab ek goree, neelee aaNkh`oN waalee ne Akhlas Ahmad ke gale meN apnee goree baaNheN aur us kee aaNkh`oN meN apnee neelee aaNkh`eN Daal kar jeb se gh`ar kee chaabee nikaal lee aur Mrs. Akhlas Ahmad ban kar us kee zindagee meN daaKhil ho gayee. woh nek-baKht apne saath` ek aaTh saal kee bachchee Nicole bh`ee le kar aayee jo us kee kisee pich`lee laGhzish kee nishaanee th`ee. ab Akhlas pakee-pakaayee family kaa maalik th`aa!

waqt apnee riwaaayatee be-murawwatee ke saath` guZartaa gayaa aur nannhee Nicole baRee hotee gayee. Akhlas us ko dekh` dekh` kar pareshaan rehtaa th`aa aur aane waale din ke Khauf se us kee raatoN kee neeNd uR gayee th`ee. apnee dunyaa kaa intiz^aam karne ke ba'd apnee beTee ke mustaqbil aur Khud apne u'qbaa kee fikr us ko khaaYe jaa rahee th`ee. Amreekah kee zarkhez zameen kaa yeh paudah tezee se baRh rahaa th`aa. dekh`te hee dekh`te koNpaleN ph`ooTeeN, shaaKheN haree huyeeN aur kaliyoN ne apnee adh`-kh`ulee aaNk`eN kh`ol kar aas paas ke hare-bh`are baaGh kaa jaa,izah lenaa shuroo' kiyaa. idh`ar yeh beree kaa paudah baRh rahaa th`aa aur udh`ar Akhlas us ko Islam kaa aab-e-zamzam pilaane kee fikr meN din raat ek kiYe detaa th`aa. beree par Dh`eloN kee baarish kaa Khauf kabh`ee us ko majboor kartaa keh gh`ar meN Islam kaa prachaar kare aur kabh`ee us ko imaam banaa kar muSalleh par kh`aRaa kar detaa jahaaN woh apnee beewee aur beTee ko muqtadee banaane kee ummeed meN baiTh`aa rehtaa. namaaz ab woh ph`ir baRe shauq se paRh`ne lagaa th`aa aur ba'd meN Allah se Islam par a'mal karne kee dua'a bh`ee riqqat se maaNgne lagaa th`aa. us kee beewee us kaa badaltaa huwaa cholaa dekh` kar baGhaawat par aamaadah ho chalee th`ee. us kee samajh` meN naheeN aataa th`aa keh aaKhir Akhlas ko kyaa ho gayaa hai keh beTee kee u'mr ke saath` us kee yeh nayee sanak bh`ee baRh`tee jaa rahee th`ee. Nicole ko yaqeen th`aa keh us ke sautele baap kaa dimaaGh Kharaab ho chalaa hai aur koyee din jaataa th`aa keh woh a'ql se mukammal ch`uTTee HaaSil kar le gaa.

ph`ir aasmaan ne woh din bh`ee dikh`aayaa jab ek din Akhlas Ahmad gh`ar poNhchaa to beewee ne faKhr se aaNkh`eN chamkaa kar bataayaa keh ab Nicole maashaa-Allah jawaan ho gayee hai aur agle itwaar ko apne boy friend ke saath` pehlee :date: par jaane kaa iraadah rakh`tee hai! yeh Khabar Akhlas par bijlee ban kar giree. pehle to us kee aaNkh`oN meN aNdh`eraa saa ch`aa gayaa. ph`ir yeh aNdh`eraa us kee aaNkh`oN meN surKhee ban kar utar aayaa aur us ne baRee ghan-garaj ke saath` e'laan kiyaa: "yeh hargiz naheeN ho saktaa hai! Islam meN :date: kee koyee ijaazat naheeN hai. tum hargiz aisee Harakat naheeN karo gee. aaKhir dunyaa kyaa kahe gee?"

baat se baat nikalte der naheeN lagtee hai. Akhlas jitnaa garm hotaa utnee hee us kee beewee kee Z^id baRh`tee jaatee th`ee. aaKhir jo kaam saaraa Amreekah ek qudratee Z^aroorat samajh`taa th`aa woh Nicole kyoN naheeN kar saktee th`ee? Akhlas ko Islam ke saath` apnee zindagee bh`ar kee kamaayee huyee sharaafat aur buzurgoN kaa naam Khat^re meN naz^ar aa rahe th`e. us ne apne qat^ae'e faiSileh kaa e'laan haath` par haath` maar kar baRe zor se kar diyaa: "mere jeete jee is gh`ar meN aisaa naheeN ho gaa! aaKhir maiN apne Allah ko kyaa muNh dikh`aa,ooN gaa?"

raawee kaa bayaan hai keh Akhlas Ahmad kee beewee ne us kee aaNkh`oN meN ek baar ph`ir apnee neelee aaNkh`eN Daal kar baRee muHabbat se pooch`aa: "kyoN jee! tumheN woh zamaanah yaad naheeN jab tum mujh` par reejh`e th`e aur us ke ba'd tum ne dunyaa ke kisee karam se haath` naheeN uTh`aa rakh`aa th`aa? us waqt apne Allah ko kaun saa chehraa dikh`aane kaa iraadah th`aa? yaa ab tumhaaree Soorat hee badal gayee hai?"
-----------------------------

افسانہ