:mujh`e koyee shaam-o-saHar yaad aayaa:

:mujh`e koyee shaam-o-saHar yaad aayaa:
nah aanaa thaa us ko, magar yaad aayaa!

huwaa aisaa maanoos barbaadiyoN se
bayaabaaN se niklaa to gh`ar yaad aayaa!

tujh`e Dh`ooNDte Dh`ooNDte kh`o gayaa maiN
na gh`ar yaad aayaa, na dar yaad aayaa!

tamaashaa-e-hastee! tamaashaa-e-hastee!
hameshah ba-raNg-e-digar yaad aayaa!

voh Khwaab-e-muHabbat, voh Khwaab-e-pareshaaN
buraa yaad aayaa, agar yaad aayaa!

naz^ar jo paRee apnee naakaamiyoN par
hameN teraa Husn-e-naz^ar yaad aayaa

nah fikr-e-safar th`ee, nah parvaa-e-manzil
gayaa jo zamaana guZar, yaad aayaa!

uTh`aayaa jo :Sarwar: ne kal saNg-e-Ghalib (1)
use bh`ee Khud apnaa hee sar yaad aayaa!
-------------------------------------
(1) ham ne majnooN pe laRakpan meN :Asad:
saNg uTh`aayaa th`aa keh sar yaad aayaa! (Ghalib)

غزل