Ghazals | غزلیں


English اردو


yooN laakh` ik Kharaabah-e-deevaar-o-dar mile
yooN laakh` ik Kharaabah-e-deevaar-o-dar mile
mushkil hai is jahaaN meN hameN apnaa gh`ar mile!

Khoon-e-jigar, Kharaabee-e-jaaN, chashm-e-tar mile
tuHfe junooN meN Khoob se kyaa Khoobtar mile!

yeh kyaa k saath` ch`oR gaye rooH-o-jaan-o-dil?
raah-e-vafaa meN koyee to ik hamsafar mile!

but-Khaanah-e-majaaz Haqeeqat-shanaas hai
meree nigaah-e-paak ko but Haq-nigar mile!

Allah re raah-e-shauq kee yeh Khud-farebiyaaN!
sab be-Khabar th`e, jitne hameN baa-Khabar mile!

jee meN hai dekh`eN kaargah-e-be,sutoon-e-i'shq
th`oRee see hee mile hameN furSat, magar mile!

aavaaragee-e-dasht-e-Khayaal-o-gumaan-e-zeest!
jaisaa safar th`aa, vaise hameN hamsafar mile!

:Sarwar:! ham un kee fikr bh`ee kar leN ge ek din
apnee talaash se hameN furSat agar mile!