muHabbat kyaa hai, kyaa hai aarzoo, begaanagee kyaa hai?

muHabbat kyaa hai, kyaa hai aarzoo, begaanagee kyaa hai?
fareb-e-yak-naz^ar hai aur yeh dil kee lagee kyaa hai?

Khudaayee aur Khudee kaa rabt^-o-Z^abt^-e-baahimee kyaa hai?
yehee ilhaam-o-i'rfaaN hai, vagarnah aur vaHee kyaa hai?

zamaanah baaz aataa hee naheeN charke lagaane se
koyee pooch`e Zaraa us se yeh aaKhir dil-lagee kyaa hai?

kisee se haNs ke mil lenaa, kisee se baat kar lenaa
yehee to hai i'baadat aur aaKhir bandagee kyaa hai?

miraa iHsaas-e-meHroomee mujh`e jeene naheeN detaa
voh andaaz-e-suKhan kyoN th`aa, yeh raNg-e-beruKhee kyaa hai?

Khudaa-aagaah ho jaataa hai insaaN Khud-shanaasee se
vagarnah gumrahee hai naam kis kaa? aagahee kyaa hai?

liye ph`irtaa hooN dil meN sail-e-GhamhaaYe-zabaaN-bandee
nah pooch` ai gardish-e-dauraaN! keh vajh-e-Khaamushee kyaa hai?

nah maiN aaGhaaz hooN us kaa. nah hee anjaam hooN :Sarwar:
miree qismat se z^aahir hai, ma,aal-e-zindagee kyaa hai!

غزل