tiraa Khayaal, tiree yaad koo-ba-koo hee sahee

Ghazal

tiraa Khayaal, tiree yaad koo-ba-koo hee sahee
"naheeN wiSaal mayassar to aarzoo hee sahee!"

jawaab aaYe nah aaYe sawaal to kar looN
isee bahaane Zaraa Khud se guftgoo hee sahee!

yeh waqt pehle bhee aayaa hai raah-e-i'rfaaN meN
tiree talaash kaa hadiyah rag-e-guloo hee sahee!

nigaah-e-saaqee-e-kaafir hee kyaa Z^arooree hai?
mai-o-rubaab sahee, saaGhar-o-suboo hee sahee!

chhupaa hai kaun pas-e-aa,eenah naheeN ma'loom
balaa se too nah mile apnee justjoo hee sahee!

isee t^araH se agar Khush hai too mire Haq meN
to aarzoo nah sahee, tark-e-aarzoo hee sahee!

buraa naheeN hai yeh haNgaamah bazm-e-yaaraaN meN
za-raah-e-dil-lagee kuchh ranjish-e-u'doo hee sahee!

Zaraa see baat par itnaa Ghuroor kyaa ma'nee?
too rashk-e-nargis-o-gul aur laalah-roo hee sahee!

kahaaN talak koyee zeHmat qaraar kee kheeNche
yeh bazm-e-shauq hai, kuchh der haaYe-o-hoo hee sahee!

sukoon-e-qalb ko kyaa chaahiYe mujhe "Sarwar"
Khayaal-o-Khwaab kee dunyaa kabhoo kabhoo hee sahee!



=======================

غزل