Ghazals | غزلیں


English اردو


kyaa kyaa i'laaj-e-dard-e-Gham-e-aarzoo kareN
kyaa kyaa i'laaj-e-dard-e-Gham-e-aarzoo kareN
daaman rafoo kareN keh girebaaN rafoo kareN?

kyaa tum se dil kee baat ho, kyaa guftgoo kareN?
"dil hee naheeN rahaa hai jo kuchh aarzoo kareN!"

fikr-e-Hayaat, Zikr-e-butaaN, yaad-e-raftgaaN
furSat mile Zaraa see to dil Ka'bah-roo kareN!

deeda-waroN kee shaan-e-Khudaayee to dekhiYe
charchaa Khud apnaa ahl-e-hunar chaar-soo kareN!

ik u'mr ham ne kaaT dee daar-o-rasan ke beech
baaqee jo reh gayee woh raheen-e-suboo kareN!

hotaa hai raah-e-zeest meN jo kuchh wohee huwaa
kyaa Khaak dil ko roYeN, jigar ko lahoo kareN!

aalaam zeest, ranj-e-junooN, dard-e-a'ashiqee
itnee Zaraa see baat par kyaa haaYe-o-hoo kareN!

bhoole se too jo aa gayaa daam-e-Khayaal meN
phir kyoN nah aaj tujh ko tire roo-baroo kareN!

Khud-aagahee meN hai nihaaN me'raaj-muntahaa
apnee Khabar mile to tiree justjoo kareN!

baRhtee hee jaa rahee hai umeedoN kee sarkashee
"Sarwar"! hai jee meN Khud ko ham aa,eenah-roo kareN577.gif