jaan tum per nicaar karte haiN

jaan tum per nicaar karte haiN
bas yehee kaarobaar karte haiN!

SaaHibo! ham Ghazal kee Soorat meN
zaKhm-e-dil aashkaar karte haiN!

tum udh`ar ihtimaam-e-daar karo
ham idh`ar Zikr-e-yaar karte haiN

ham haiN Khud zindagee se sharmindah
aap kyoN sharmsaar karte haiN?

ahl-e-dunyaa kee gar yehee Z^id hai
Khaamushee iKhtiyaar karte haiN

pehle dunyaa se dil lagaate haiN
ph`ir gile ham hazaar karte haiN!

Khud tamaashah haiN, Khud tamaashaayee!
is t^araH Khud ko Khwaar karte haiN

kis qadar saadah-lauH haiN :Sarwar:!
Husn kaa e'tibaar karte haiN!

غزل