shab-e-umeed hai seene meN dil machaltaa hai

shab-e-umeed hai, seene meN dil machaltaa hai
:hamaaree shaam-e-suKhan kaa chiraaGh jaltaa hai:

nah aaj kaa hai bharosah, nah hee Khabar kal kee
zamaanah roz nayee karwaTeN badaltaa hai

a'jeeb cheez hai dil kaa mu,a'amilah yaaro
saNbhaalo laakh magar yeh kahaaN saNbhaltaa hai!

nah teree dostee achhee, nah dushmanee achhee
nah jaane kaise tiraa kaarobaar chaltaa hai!

sunaa hai aaj wahaaN meraa naam aayaa thaa
umeed jaag uThee, dil meN shauq paltaa hai

wohee hai shaam-e-judaayee, wohee hai dil meraa
karooN to kyaa karooN, kab aayaa waqt Taltaa hai!

mile gaa kyaa tumheN yooN meraa dil jalaane se
bhalaa sataa ke GhareeboN ko koyee phaltaa hai?

isee kaa naam kaheeN dard-e-a'ashiqee to naheeN?
lage hai yooN koyee reh reh ke dil masaltaa hai

nah dil-shikastah ho bazm-e-suKhan se too :Sarwar:
nayaa chiraaGh puraane diYe se jaltaa hai!

غزل