Ghazals | غزلیں


English اردو


jis qadar shikwe th`e sab Harf-e-du,a'a hone lage
jis qadar shikwe th`e sab Harf-e-du,a'a hone lage
ham kisee kee aarzoo meN kyaa se kyaa hone lage

bekasee ne be-zabaanee ko zabaaN kyaa baKhsh dee
jo nah keh sakte th`e woh ashkoN se adaa hone lage

ham zamaaneh kee suKhan-fehmee kaa shikwah kyaa kareN?
jab Zaraa see baat par tum bh`ee Khafaa hone lage

raNg-e-meHfil dekh` kar duniyaa ne naz^reN ph`er leeN
aashnaa jitne bh`ee th`e naa-aashnaa hone lage

har qadam par manzileN katraa ke door hone lageeN
raazhaaYe zindagee yooN ham peh waa hone lage

sar-bareedah, Khastah-saamaaN, dil-shikastah, jaaN-ba-lab
a'ashiqee meN surKhroo naam-e-Khudaa hone lage

aagahee ne jab dikh`aaYee raah-e-i'rfaan-e-Habeeb
but th`e jitne dil meN sab qiblah-numaa hone lage

a'ashiqee kee Khair ho "Sarwar" keh ab is shehr meN
waqt woh aayaa hai bande bh`ee Khudaa hone lage!