yooN aaftaab-e-shauq shab-e-Gham meN Dhal gayaa

yooN aaftaab-e-shauq shab-e-Gham meN Dh`al gayaa
jaise shabaab door se bach kar nikal gayaa!

dil soz-e-a'ashiqee se sar-e-shaam jal gayaa
thaa zindagee meN ek hee kaaNTaa, nikal gayaa!

tum aaYe th`e to ek zamaanah th`aa saazgaar
tum kyaa gaYe keh ek zamaanah badal gayaa

Haalat peh meree ahl-e-Khirad is qadar haNse
jitnaa th`aa un kaa shauq-e-tamaashah nikal gayaa!

naadaaN th`e ham jo Khwaahish-e-duniyaa kiyaa kiYe
naadaaN th`aa dil jo dekh` ke duniyaa machal gayaa

ham shehr-e-aarzoo meN bh`aTakte ph`iraa kiYe
dil th`aa hamaaraa ek hee naadaan, behel gayaa!

kyoN har sawaal meraa sawaal-e-Ghalat^ huwaa
kyoN har jawaab teraa siyaasat meN Dh`al gayaa?

:ai dost! aa bh`ee jaa keh maiN taSdeeq kar sakooN:
sab keh rahe haiN, mausam-e-hijraaN badal gayaa!

"Sarwar"! tire KhulooS-o-muHabbat kaa kyaa kareN
sikkah hee ik nayaa sar-e-baazaar chal gayaa!

غزل