jab bh`ee teraa Khayaal aayaa hai **

jab bh`ee teraa Khayaal aayaa hai
dil ne kyaa kyaa nah gul kh`ilaayaa hai!

ai Gham-e-i'shq! teree u'mr daraaz
waqt kyaa kyaa nah ham pah aayaa hai!

Khud pah kyaa kyaa nah ham ne jabr kiyaa
jab kaheeN jaa ke Sabr aayaa hai!

doosraa Gham kaheeN ubh`ar aayaa
ek Gham gar idh`ar dabaayaa hai!

kh`el ulfat kaa hai a'jab hee kh`el
Khud ko kh`oyaa to us ko paayaa hai!

mujh` ko naadaan is qadar nah samajh`
jaan kar yeh fareb kh`aayaa hai!

dil peh jo iKhtiyaar th`aa nah rahaa
lab pah teraa jo Zikr aayaa hai

ph`ir wohee sheeshah hai, wohee patth`ar
dekh`iYe kyaa payaam aayaa hai!

Khud-baKhud aaj aaNkh` bh`ar aayee
jaane kis kaa Khayaal aayaa hai!

hai shab-o-roz aaNsoo,oN se kaam
rog "Sarwar" ne kyaa lagaayaa hai!

غزل