guZar gayaa yeh agar waqt to fasaanah huwaa **

guZar gayaa yeh agar waqt to fasaanah huwaa
bigaR gayaa to Kharaabee kaa ik bahaanah huwaa!

Hareem-e-i'shq se jo shaKhS aashnaa nah huwaa
Khudaa gawaah! woh shaa,istah-e-Khudaa nah huwaa!

yehee to ek kasar reh gayee ke mar nah sake
tumheeN kaho keh muHabbat meN aur kyaa nah huwaa?

yeh kam hai kyaa keh muHabbat meN paa liyaa Khud ko?
balaa se koyee hamaaraa huwaa, huwaa nah huwaa

i'laaj-e-dard-e-Ghareebaan-e-shauq ho jaataa
magar unheN kabh`ee marne kaa HauSilah nah huwaa!

kisee bahaane to aaKhir ko maut aanee th`ee
gaYe jo jaan se ulfat meN, kuch` buraa nah huwaa

:hamaare Zehn meN is fikr kaa hai naam wiSaal:
Gham-e-Habeeb kabh`ee jaan se judaa nah huwaa!

a'jeeb cheez hai dil kaa mu,a'amilah "Sarwar"!
jo qarZ^-e-dost adaa ho gayaa, adaa nah huwaa!

غزل