kashaa-kash-e-Gham-e-hastee sataaYe, kyaa kahiYe! **

kashaa-kash-e-Gham-e-hastee sataaYe, kyaa kahiYe!
ph`ir us peh soz-e-darooN dil jalaaYe! kyaa kahiYe!

KhulooS-e-lut^f ko Dh`ooNDaa kiYe zamaaneh meN
chale jahaaN se, waheeN lauT aaYe! kyaa kahiYe!

woh paas reh ke rahe door ik karishmah hai
woh door reh ke magar paas aaYe, kyaa kahiYe!

saNbh`al saNbh`al ke chale soo-e-dair go maikash
qadm kuch` aise magar laRkh`aRaaYe, kyaa kahiYe!

koyee Hareef-e-Gham-e-zindagee naheeN dekh`aa
Hareef yooN to bohat aazmaaYe, kyaa kahiYe!

yooN aaftaab ch`upaa shaam-e-Gham kee chaadar meN
keh jaise nabZ^ koyee Doob jaaYe! kyaa kahiYe!

hameN yeh Z^id keh sawaal-e-t^alab naheeN karte
unheN yeh Z^id keh yeh Khaalee hee jaaYe, kyaa kahiYe!

laraz rahaa hai guhar-taab dil sar-e-miZhgaaN
sitaarah-e-saHaree jh`ilmilaaYe kyaa kahiYe!

Hikaayat-e-Haram-o-dair Khoob hai "Sarwar"!
magar yeh shaam-o-saHar haaYe! haaYe! kyaa kahiYe!

غزل