Ghazals | غزلیں


English اردو


dekh`naa hai keh wahaaN saamne kyaa aataa hai
dekh`naa hai keh wahaaN saamne kyaa aataa hai
dil tiree bazm meN kh`eNche to liYe jaataa hai!

be-ruKhee aisee bh`alaa apnoN se kee jaatee hai?
SubH kaa bh`oolaa huwaa shaam ko gh`ar aataa hai!

bekasee gar yeh naheeN hai to bataa,o kyaa hai?
saath` dete huYe saayah miraa gh`abraataa hai

har qadam ashk-e-junooN, aah-e-parehaaN har gaam
dard kaa i'shq se kaisaa yeh a'jab naataa hai!

din guZartaa hai tiree yaad kaa taanaa bunte
shaam hotee hai to sheeraazah bikh`ar jaataa hai

is t^araH tark-e-ta,a'lluq nah kareN bandah-nawaaz!
baat reh jaatee hai aur waqt guZar jaataa hai!

SubH ko kaavish-e-Gham, shaam ko ummeed-e-saHar
silsilah Gham kaa ulajh`taa hee chalaa jaataa hai

Khoob kaT,tee hai jo mil baiThe haiN deewaane do
dil ko samjh`aataa hooN maiN, woh mujh`e samjh`aataa hai

hai wohee yaad, wohee ek tamannaa lekin
dil! keh afsaaneh pah afsaanah kahe jaataa hai

kaisaa maanoos-e-junooN ho gayaa "Sarwar" dekh`o
chain kaa us se karo Zikr to gh`abraataa hai!