Ghazals | غزلیں


English اردو


har saNg pah likkh`aa miraa afsaanaa rahe gaa *
har saNg pah likkh`aa miraa afsaanaa rahe gaa
deewaanah to deewaanah hai, deewaanaa rahe gaa

is u'mr meN ham yaad-e-Khudaa Khaak kareN ge
dil jaisaa th`aa waisaa hee Sanam-Khaanaa rahe gaa!

jitnaa ke Gham-e-i'shq meN dushwaar hai jeenaa
us darjah hee aasaan hameN mar jaanaa rahe gaa

ai dost! tiraa aanaa hameN yaad naheeN hai
haaN! yaad bohat teraa chalaa jaanaa rahe gaa

lo dil bh`ee chalaa i'shq meN haath`oN se nikal kar
kyaa shehr-e-wafaa meN koyee apnaa na rahe gaa?

kyaa keejiYe muddat se hai dastoor hee aisaa
maikash to chale jaaYeN ge, maiKhaanaa rahe gaa

Ghurbat meN bh`ee hai saayah-e-deewaar kee ummeed
ai dil! too kahaaN tak yooN hee deewaanaa rahe gaa?

"Sarwar"! jo rahee Haalat-e-giryah yehee teree
ph`ir koyee bh`ee daryaa kaheeN pyaasaa nah rahe gaa